Egg- Citing news!
Notisia eksitante! E kompania nobo RoffaReefs, fundá na Rotterdam Zoo, ta bai tèst su sistema di kria (‘kweek’) piská na Boneiru. E diseño di mas nobo di e sistema lo ser di tèst ku ayudo di Dive Friends na e sitio di Sand Dollar. Danki na un kontribushon di e Fondo di Inovashon di Wereld Natuur Fonds (WWF-NL), e sistema di ‘kweek’ di RoffaReefs por ser mehorá dor di tèst e riba e ref di koral di Boneiru. E sistema a ser trahá na Rotterdam Zoo i lo ser usá den otro akuarionan na Hulanda i Fransia.
RoffaReefs lo hasi investigashon na Boneiru komo parti di e ‘Strategia Marino pa Karibe Hulandes’ di Wereld Natuur Fonds (WWF-NL). E plan akí di sinku aña ta enfoká riba konservashon i rekuperashon di e refnan di koral den Karibe Hulandes. Un parti krusial pa yuda refnan rekuperá ta pa aktivamente restorá piskánan di e ref. Piskánan di ref ta vital pa e salú di refnan di koral, por ehèmpel, dor di kome alganan ku ta krese eksesivamente. Esaki ta oumentá e sobrebibensia, salú i abundansia di koralnan yòng, i p’esei piskánan ta un nesesidat pa mehorá e efikasia di replantashon di koral.
WWF-NL ta sostené e proyekto akí pasobra desafortunadamente, hopi espesie di animal no ta biba den nos besindario (mas) i parkenan di bestia ta hunga un ròl importante pa loke ta trata informashon i edukashon tokante e espesienan akí. E konsientisashon akí ta krítiko pa sigui haña sosten pa konservashon mundial di naturalesa.
Proyektonan di restorashon di koral normalmente no ta integrá restorashon di otro espesienan relashoná, manera piská di ref. Piská di ref ta un komponente klave di e ekosistema di e ref di koral. RoffaReefs a diseñá un sistema flotante pa kria (‘kweek’) larva di piská marino, tantu den akuario komo den naturalesa. Ku e sistema akí, ta premirá ku e larvanan lo tin mas chèns di sobrebibí. Pero pa por haña e larvanan marino akí, lo pone vários nèt den laman rondó di Boneiru. Nan lo ta pegá na e buinan hel di STINAPA, por fabor laga nan keda den awa! Ku e datonan ku nan haña di e estudio piloto akí, RoffaReefs por hasi mehorashon na e sistema di ‘kweek’ pa e siguiente pruebanan den kolaborashon ku WWF-NL i STINAPA.
Nos sistema di ‘kweek’ na Sand Dollar
Riba nos promé dia nos tabatin un reunion ku e kompania Dive Friends. Nos tabatin mester di un bon lokalidat pa nos sistema di ‘kweek’, pues nos a papia ku “Roy Smith” tokante e oportunidat pa laga e sistema di ‘kweek’ keda pegá na un boto na Sand Dollar. N’e lokalidat akí na Kralendijk, e profundidat di laman ta optimal i tin tambe e oportunidat pa usa e boto komo lugá di trabou.
Despues di konsultá ku STINAPA nos a disidí di pone nos sistema einan. E sistema a bini ku avion i a yega na Sand Dollar dia 4 di òktober. Despues di algun dia di montahe i un tormenta chikí, e tabata kla pa ser lansá dia 7 di òktober. Nos a haña hopi mas yudansa ku nos a spera. Un danki spesial na Roy Smits, Amir Wilson i Eddy Klijs di Dive Friends, kendenan a yuda nos durante henter e dia! Amir a asta hasi algun ronda ku nos e dianan anterior, pa kolektá muestra di webu di piská.
Kondishonnan ekselente!
Lamentablemente, un di nos panelnan solar a kibra ora nos a lansa nos sistema. Pero spesialmente Eddy, Yuma i Louise a sigurá ku nos por tabatin e sistema kla ta funshoná na fin di dia! Nos ta ahustando e konfigurashonnan aworakí pa sigurá ku nos tin e kondishonnan adekuá pa pone nos promé lotenan di webu di piská, prosedente di refnan di koral Boneriano, den nos sistema!